بــهــاء عــجــمــي..الرأي السياسي

الشرطة في خدمة الشعب (قديمة)

الشرطة في نكسة الشعب (مبارك علينا)

بقلم /بهاء عجمي

النهاردة انا مش جاي اتكلم عن موضوع الظلم واللي الشرطة بتعملوا في الناس والكلام ده

لان من الاخر كدة كلنا عارفين الشرطة بتعمل ايه

حتى من قبل وكسة الدستور الممزق بتاعنا ..الشرطة ليها باع طويل في الظلم البشري

وفي تحقير الانسانية وسحق كرامة المواطن المصري

من قفيان لنفخ في التوتة لتعليق من الاقدام ... واختراعات وحوارات واشغالات

وكل ده مش جديد

انا ححكيلكم عن حاجة بتحصل تقريبا يوميا في محافظة من محافظات صعيد مصر

محافظة اسيوط

محافظة اسيوط فيها شباب كتير مغتربين اللي بيدرس واللي بيشغل واللي عايش

يعني تقدروا تقولوا كدة كلها شباب

الشباب دول بعيد عن اهلهم وصحابهم وجيرانهم بسكة سفر طويلة جدا

اكيد بتقابلهم مشاكل وصعوبات وخساير في حاجات كتير جدا

لكن اول ما الواحد من دول  يشغل مخه شوية ويقول انا لازم اشوف حل

ربنا بيلهمه علطول وبيهديه للطريق الصح (الهداية)

يقوم الشاب منهم يمشي في طريق الدين يتعرف اكتر عليه

يربي دقنه يقصر البنطلون يصلي في الجامع  يقرا قرأن

بذمتكم هل دي حاجة غلط ؟ والا يفضل زي ما كان الاول قبل الالتزام

مخدرات وبنات وقلة ادب ومصخرة

المهم

يلتزم صاحبنا ويمسك نفسه عن كل المعاصي اللي كان بيعملها ويوحد ربنا في قلبه

وينزل الجامعة ع الصبح بدري عشان يشوف دروسه

ولكن ...بوابة الجامعة بالمرصاد لهذا النوع من الشباب (الملتزم)

وكأنه يسرق لحيته ويسالونه (من اين لك هذا)

فين كارنيهك؟ انت في كلية ايه ؟ مربي دقنك ليه ؟ انت بتصلي والا ايه ؟

ممنوع دخول الجامعة بالمنظر ده ؟!!!!

في الوقت نفسه ان ده كان منظر النبي محمد عليه الصلاة والسلام

اللي احنا بنثوروا وننفعلوا لو حد غلط فيه وفي منظره

ادي منظر النبي (ص) بقى ممنوع من دخول الجامعة

الشباب عادي بقى حيعملوا ايه

خلاص نرجعوا البيت ..هات الكارنيه يا عم عشان نروحوا

لا يا حبيبي الكارنيه ده تروح تاخده بالليل من امن الدولة  لاننا حنوديه هناك دلوقتي

هو الشاب ده عمل ايه لكل ده ؟ ده بالعكس المفروض تحترمووه

ده عرف ربنا ! لا بيتبع جماعة ارهابية ولا حتى له اي نشاط سياسي

مجرد انه بس مرة فكر صح

فكر ان الدين هو الحل للي هو فيه من غربة ونكد ومشاكل وبعد عن اهل

يمنع من دخول الجامعة يسمع كلام مالوش اي معنى ويروح بالليل امن الدولة ومش بمزاجه بالعافية

ده غير الحملات اللي بتجيلنا ع الشقق كل يومين تلاتة

ايشي امن دولة ايشي مكافة ارهاب ايشي اداب ايشي مخدرات

ويقعدوا يرزعوا ع الباب ولا كأننا مخبيين بن لادن عندنا

زي ما الامريكان بيدخلوا بيوت العراقيين يفتشوها

وياريت بيتكلموا بطريقة عدلة او محترمة او حتى بالذوق وصوت واطي

كارنيهاتكم يا ولاد الكلب اخلص يا روح امك انت وهو انت لسة حتطلع المحفظة

وطبعا لو حد جرب يفتح بقه ويقول بم

حنسمع بجانب الكلام ده اصوات تانية زي (طاخ طيخ اي اوه طاخ اي اوه اه )

كل ده ليه ؟ وعشان ايه ؟ عشان انتم طلبة في جامعة اسيوط

طب لو مثلا الطلبة دول ليهم نشاط ارهابي او اجرامي او مسجلين خطر

ممكن نقولوا حقهم يعملوا كدة ومش مهم حكاية حقوق الانسان دي نتغاضى عنها

لكن كل ذنبهم وذنبنا انهم طلبة جايين قاصديين علم

المهم

صاحبنا يروح امن الدولة بالليل يجيب الكارنيه بتاعه عشان يبقى معاه حاجة تثبت انه طالب

يدخل للظابط والظابط طبعا بكل احترام بيقعده على الكرسي

بس مس مش الكرسي الجلد اللي بالكم فيه

ده كرسي تاني كدة طوووووويل ورررفيع وساعات بيتحرك  (كرسي اعتراف يعني )

وهاتك يا اسئلة

انت بتصلي ؟ انت مسلم ؟ انت بتاكل ايه ؟ مربي دقنك ليه ؟ يعني انت فاكر انك كدة صح ؟

ياخي يلعن ابو ام الحكومة اللي بالشكل ده !!!

بقى بدل ما نحافظ على دينا ونحس الشباب على انهم يلتزموا بنكرهم في الدين بتاعنا بالطريقة الفظيعة دي

بجد بجد يعني ,ده حرام ده ظلم ده افترى ده لو يهود مش حيعملوا فينا كدة

والواد يا عيني بيجاوب بكل صراحة ماهو ملتزم بقى

بصلي عشان انا مسلم . مربي دقني عشان بقتدي بالنبي محمد .بقرا قرأن عشان بيريحني نفسيا

يعني اجابات كلها منطقية جدا ومحدش يقدر يقول ان الواد ده ارهابي او مسجل خطر

ده انا لو مكان الظابط ده كنت بوست على راس الواد وقلتله ربنا يوفقك يابني

انا مش عارف في ايه

المهم بعد ما يجاوب المسكين على كل الاسئلة دي وبكل صراحة طبعا

يرد الظابط يقله (بكرة تروح تحلق دقنك دي وتبطل الهبل اللي انت بتعمله ده)

الاسلام بقى هبل ؟ الالتزام وحب الدين والتمسك بيه بقى عيب ؟ الايمان والتدين في زمن مبارك بقى حرام ؟

انا نفسي اشوفهم حيعملوا ايه يوم القيامة الناس دي ؟!

وطبعا الولد ده حالته النفسية تبوظ وتبقى في الارض ويطلع من امن الدولة بيسب ميت دين

ماهو لا كدة نافع ولا كدة نافع

لو شرب مخدرات ومشى مع بنات وبقى بيسمع اغاني ويتفرج على سكس حيبقى عيل فاشل وربنا مش راضي عنه!!

ولو ربى دقنه والتزم ومشى في طريق الدين وبقى بيصلي وعارف ربنا حيبقى اهبل والحكومة مش راضية عنه!!

انهو احسن ؟ الحكومة ترضى عنك  والا ربنا ؟؟ طبعا كلكم عارفين الاجابة والحل

وعشان كدة

بيرجع الولد ده تاني يشرب سجاير ويعاكس بنات ويسب دين ويرقص ويتنطط ومش بعيد يقلع في الشارع

عشان رضى الحكومة والشرطة بتاعتنا

بذمتكم

اي شرع واي دين يقول

انا عايزك تكون بلطجي وصايع ومش عايزك تكون ملتزم ومؤمن

ده شرع مبارك ربنا يباركله في صحته يارب

ويهديه بقى

يمكن يربي دقنه هو كمان ويروح امن الدولة ويعرف ساعتها هو كان بيعمل فينا ايه

بس بجد

احنا لو فضلنا كدة ساكتين ع الظلم ده علطول عشان خايفين من موت وسجن وتعذيب وكدة

يبقى اسف اسمحولي اقولكم  (حتبقوا كلكم زي الظابط الحيوان ده )

هو بيعصي اوامر ربنا ويطيع اوامر الشرطة ومبارك

وانتم بتعصوا اوامر ربنا وتطيعوا اوامر الظابط

ع العموم انا حكايتي ماخلصتش مع الشرطة المصرية

لان ليا معاها حوار طويل جدا حصل في قطار الصعيد حبقى اقولهلكم بعدين

وتحياتي لماما سامية والاسرة والاخوات وسوسو وموسو وكوسو وبوسو

ومن اسرة البرنامج لانكل زيد وعبيد وبهديلكم الاغنية دي

(كل شئ انكشفن وبان) ويان ها ....بغمز ها .. الحدق يفهم بقى

تحياتي

بهاء عجمي

bahaa @ 02:27
Wapher | del.icio.us