بــهــاء عــجــمــي..الرأي السياسي

بسم الله الرحمن الرحيم

وبه نستعين

أما بعد

....

هم يضحك وهم يبكي

بقلم/ بهاء عجمي

.

اعجبتني كثيرا اغنية من أغاني هذا الزمن العجيب

يتغنى بها المطرب الشاب محمد عدوية

وشوش الناس

.

بالظبط بيوصف حال الناس وهمومهم ومشاكلهم..طبعا اللي ماحدش يعرف يوصفها

من كتر مشاكل وهموم الناس

.

في وشوش الناس حكايات..فيها الفرح وفيها اهاات

فيها اللي ما بيتنسى..فيها اللي عدى ومر فات

دي وشوش الناس مليانة..والدنيا دي فيها وفيها

في ناس بتعيش فرحانة..وناس الحزن ماليها

.

جربتو مرة كدة تقعدوا على اي كافتريا من كافتريات محطة مصر (اسكندرية)

وتراقبوا الناس اللي رايحين واللي جايين

قد ايه دنيا تانية خالص جوة كل واحد ماشي

قد ايه في مشاكل عند الناس احنا نفسنا ماوصلناش نصها

نصها ايه...ربعها او تمنها

نقولو الحمدلله

.

اللي ماشي عاقد حواجبو ومش طايق حد يكلمو عشان مراتو منكدة عليه عيشة اهلو

واللي ماشي بيتعارك مع دبان وشو عشان دفع ربع جنيه اجرة زيادة في المواصلات

واللي ماشي فاشخ بئوو شبرين عشان في جيبو فلوس كتير حوالي 13 او 14 جنيه ونص

واحد يقولي  وهي دي هموم يا عم بهاء

عندك حق

عمر الماديات ماكانت هموم ...

.

طب جربتو مرة تدخلوا اي مستشفى عام كدة زي الميري او الطلبة

جربتو تدخلو الاقسام وتشوفو الناس اللي عندها هموم بجد

.

شوفتو الناس اللي بتغسل كلى في نفس الوقت اللي فيه ناس بتغسل اموال فيه

شوفتو البشر اللي مش لاقيين غرفة عمليات فاضية عشان فلوسهم ماكفتش كلاس وان

.

ربنا يشفي الجميع يارب

يارب خفف على الناس وطأة ظلم البشر لنفسهم

يارب خفف على الناس مشاكل عيشتهم

يارب خفف على الناس بلاويهم وهمومهم ومشاكلهم

يارب ارحمنا برحمتك واغفر لنا ذنوبنا ما ظهر منها وما بطن

....

..

في نفس الوقت ده يا جماعة واحنا بنراقبو ونشوفو ونتفرجو على هموم الناس ومشاكلهم

في ناس تانية غرقانة في هموم العسل ومشاكل الخيار المخلل واللمون المعصفر

في ناس تانية بتمص دم البشر عشان تعيش

في ناس تانية كل همومهم ان الصيف يا خسارة بيجي في شهر سبعة وستة وهما عايزينو في شهر اتنين !!

في ناس مشاكلها بتقتصر على تأخير اجراءات فيزا الدنمارك وبلجيكا وهولندا لعمل سفاري محترم

في ناس بلاويها انها كسبت النهاردة 4 مليون دولار بدل ما تكسب 6 و7 مليون

.

في نفس الوقت اللي فيه ناس مش لاقية حق رغيف العيش...أيوة  الشلم .حق رغيف العيش

تصوروا

في نفس الوقت ده..في ناس بتسرق وتنهب وتاكل اموال الناس بالباطل وعيني عينك

.

في امريكا واوروبا بيصرفو للشباب اعانة بطالة لو الشباب مش لاقيين شغل مثلا مثلا يعني

وبتوصل اعانات البطالة دي لاربع او خمس الاف دولار في الشهر

يعني حوالي 25 او 30 الف جنيه مصري في الشهر اعانة بطالة

واحنا عندنا في مصر كمان بنصرفوا للشباب اعانة بطالة

لكن حرصا مننا على صرف اموال الدولة في اماكنها المناسبة

فبنصرفوا اعانة البطالة دي للشعب على هيئة بضاعة

.

برشام

حشيش

بانجو

.

وكلو بحسابو وتمنو وهنيالك يا فاعل الخير

.

لو معاك شهادة ومش بتشتغل

حنصرفولك اعانة بطالة حسب شهادتك

لو مؤهلك عالي

اتفضل اشرب حشيش

لو مؤهلك متوسط

ادخل ع البانجو بقلب جامد

لو يا حبة عينك مؤهلك زبالة او مافيش

روح ع البرشام وماتسميش

....

وللاسف حتى البودرة والافيون والحاجات اللي بتكلف الدولة دي

مش اي حد بيشربها

لازم تكون ابن وزير او ابن رئيس جمهورية او ابن احمد عز بتاع الحديد

عشان لو شديت سطرين هيروين وخبطلك عيل غلبان بعربية ومات فيها

تلاقي حد يسندك ويطلعك منها زي الشعرة م العجينة

...

لكن الغلابة بتوع الحشيش والبانجو والبرشام

اخرهم يعملو ايه يعني

يسرقوا؟

يقفوا ع الئمم يعاكسو بنات قالعين هدومهم ومحترمات ع الاخر خالص مالص ؟

يتحولو بقدرة قادر لبلطجية ونصابين؟

وايه يعني

ماهو كل برغوت على قد دموو

كل برغوت في عهد وعصر ومغرب وعشا مبارك

على قد دمو

...

وعشان الغلابة في عهد وعصر مبارك

في ناس تانية بتمص دمهم

يبقى ماعندهمش دم اصلا

وكل برغوت على قد ؟؟؟

.

اللهم اغفر لنا وارحمنا واجعلنا من الصالحين الصادقين الصابرين

اللهم تقبل منا صلاتنا وقيامنا ودعاءنا

اللهم اغفر لنا ولوالدينا وارحمهما كما ربيانا في الصغر

اللهم استر علينا وعلى اهالينا وعلى اخوتنا ونساء المسلمين

اللهم اخفس الارض بمبارك واللي معاه

اللهم خد حبيب العادلي وشل فتحي سرور واحرق احمد عز بجاز وسخ

امين يارب العالمين

امين

.

هم يـ هأهأ

و

هم يـ هئ هئ

و

تحياتي

بهاء عجمي

bahaa @ 11:34
Wapher | del.icio.us